Upp á síðkastið hef ég verið að dunda við að setja upp formúlublað í stærðfræði. Ég tók það verkefni að mér með þeim fyrirvara að ég fengi að setja það upp í LaTeX. Hugmyndin er sú að láta þetta formúlublað fylgja öllum prófum sem nemendur taka, öllum kaflaprófum og lokaprófum. Þetta á því að vera samansafn allra formúla sem nemendur gætu þurft að grípa til í framhaldsskóla stærðfræði (að undanskildri tölfræðinni sem fær sitt eigið formúlublað). Þetta er að sjálfsögðu ekki tæmandi listi, þarna vantar margar gagnlegar formúlur, enda ætlumst við til að nemendur læri nokkrar utanbókar.
Núna sit ég svo sveittur við og plasta þetta inn, því þá getum við endurnýtt blöðin aftur og aftur. Mig langaði bara til að deila með ykkur dýrðinni, enda er ég býsna hreykinn af þessu verki. Ekki síst er ég ánægður með seinni blaðsíðuna þar sem ég sýndi áður óþekktar hliðar í þrívíddarteikningu. Raunar var ekki hlaupið að því að gera þessar teikningar, ég lærði á lítið skriftarmál sem heitir Eukleides, sem þýðir skipanir yfir í PS-tricks skipanir sem LaTeX skilur. Þannig gat ég búið til PS-skjal sem ég umbreytti svo yfir í PDF-skjal. Áranginn má sjá hér.
7 Ummæli
fim 8 febrúar, 2007 klukkan 0:18
Þetta er drulluflott, verð ég að segja.
fim 8 febrúar, 2007 klukkan 13:36
Já, þetta er flott blað,
En koma nemendur í frammhaldskólum ekki til með að horfa á þetta blað líkt og þegar við sáum formúlublaðið í rafsegulfræði fyrst?
fim 8 febrúar, 2007 klukkan 16:57
Takk, takk. Ég er nokkuð stoltur af þessu.
Jú, þetta hefur ákveðinn fælingarmátt.
Við höfum hugsað okkur að tækla það með því að segja nemendum okkar að þetta séu formúlurnar sem þau þurfa aldrei nokkurn tímann að læra utanað.
Svo höfum við líka rætt það í bríaríi að “ljúga” að nemendum, og segja þeim að heildunarformúlurnar komi ekki fyrr en í STÆ700 (sem er valáfangi og sjaldan kenndur) þegar þær koma raunar strax í 600.
mið 14 febrúar, 2007 klukkan 23:21
Þetta er hið magnaðasta blað. Þú hefur augljóslega náð slíkum tökum á LaTeX tækninni að annað eins er fáheyrt.
Ég er líka ánægður með að blaðið hafi verið “gjört 2007″ – þarna tókst þér að slæða litlum Benna í blaðið og mun þetta orðfæri halda merkjum málsnilldar þinni á lofti um ókomin ár!
PS. Emil, “þegar við sáum formúlublaðið í rafsegulfræði fyrst” … ég veit ekki til þess að ég myndi líta þetta formúlublað neinum öðrum augum heldur en fyrst þegar ég leit á það – með óttablandinni virðingu.
fim 15 febrúar, 2007 klukkan 15:26
Spurning hvort það væri hægt að pota lítilli phdcomics.com mynd á seinna blaðið. Getur sett litla teikningu inn í þríhyrninginn. Þá munu nemendur líklega hlægja að nördahætti kennara, EN með því munu þau pottþétt muna eftir formúlublaðinu í mörg ár! Ef markmiðið er að gera stærðfræðina áhugaverðandi (eða fyndnari), þá myndi ég klárlega setja inn litla teiknimynd. Pottþétt aðferð til að láta nemendur hlægja að stærðfræði.
fim 2 október, 2008 klukkan 11:33
Takk takk
Er að kenna barnabörnum og þurfti á formúlunum að halda.
Kennarar vita ekki að það á að afhenda börnum formúlublöð.
Kennslubækur í stærðfærði eiga að vera með svörum á dæmum. Það flýtir fyrir námi og skilningi á verkefnunum.
Er stærðfræðikennslu að fara aftur?
Kærar þakkir aftur,
og bestu kveðjur, Guðmundur G.
fim 2 október, 2008 klukkan 16:46
Þakka þér Guðmundur fyrir að skilja eftir kveðju.
Það gleður mig sérstaklega að einhver finni not fyrir formúlublaðið!
Ég er nokkuð sammála með þér að það þjóni litlum tilgangi að láta nemendur læra formúlurnar utanað, öllu máli skiptir að þeir kunni að nota formúlurnar.
Varðandi svör við dæmum, þá er ég beggja blands. Ég held að nemendum sé *líka* hollt að glíma við verkefni og dæmi sem þau hafa ekki svörin við. Það er besti undirbúningurinn fyrir líf utan kennslustofunnar. En auðvitað eiga að vera svör við mörgum dæmum og lausnir sömuleiðis við völdum dæmum (e.k. sýnidæmi).
Fyrir forvitnissakir, á hvaða aldri eru barnabörnin, þ.e. hvaða stærðfræði eru þau að basla við?
Bestu kveðjur,
Benedikt.